ليه اسم “أحمس “؟
كلنا اتعلمنا في المدارس إن أحمس كان حاكم عظيم وقاهر الهكسوس وموحد مصر. لكن الكتير من الناس مايعرفوش إنه أول شخصية تاريخية تنظم فريق متطوعين لإنقاذ ضحايا الزلازل.
علشان كدة احنا بنستخدم اسمه، من ناحية لأنه رمز لوحدتنا كمصريين ولقدرتنا على مواجهة الصعاب ومن ناحية تانية لأنه من رواد تنظيم العمل التطوعي.
شغلنا في فريق أحمس بيدور حوالين ثلاث محاور: البيئة ، المساعدة والإنقاذ.
البيئة
العالم كله بيواجه خطر تدهور الحالة البيئية. لكن الواقع للأسف، إن في مصر الوضع أسوأ بكتير من اللي ممكن نتصوره، خاصةً مع نقص المعلومات المتاحة في المجال ده بالإضافة إلى قلة الوعي العام عن الوضع البيئي للبلد وكيفية التعامل معه وتحسينه.
في فريق أحمس احنا حريصين على توعية المجتمع بالمخاطر البيئية المحيطة به، زي مشروعنا في توعية سكان حي الزبالين في منشية ناصر بمرض الالتهاب الرئوي عند الأطفال. احنا برضو بنشجع ثقافة إعادة التدوير إبتداءً بالقمامة لحد إعادة توزيع لعب الأطفال بعد تجميعها وتصليحها.
المساعدة
من الصعب اختصار المساعدة المجتمعية في تجميع التبرعات وإطعام الفقير. في فريق أحمس احنا بنؤمن إن أهم عامل هو الاستدامة والاستمرار في المساعدة بشكل منتظم وفعال.
بنسعى لتحقيق ده أولاً عن طريق التنبيه والتوعية بالمخاطر المحيطة بينا وثانياً عن طريق القيام بحملات زي حملة ترميم المدارس والتركيز فيها على المتابعة بصفة منتظمة وتوعية الطلبة بأهمية الحفاظ على نظافة وجمال مدارسهم.
الإنقاذ
بيسعى فريق أحمس إنه يكون أول فريق متطوعين مصري يقدر يستجيب للكوارث زي الزلازل، أو انهيار المباني أو السيول ، إلخ … بيدور شغلنا هنا حوالين التدريب على الاستجابة الأولية والإنقاذ في حالة الأزمات.